Global Slowdown Darken | अमेरिकेत पीएमआय डेटानुसार आर्थिक मंदीचे स्पष्ट संकेत, संपूर्ण जगासमोर मंदीचा धोका

Global Slowdown Darken | जुलैच्या सुरुवातीच्या पीएमआय डेटाने अमेरिकेच्या युरो झोन आणि जपानपर्यंतच्या रेंजमध्ये धोक्याची घंटा वाजविली आहे. शुक्रवार, २२ जुलै रोजी जाहीर करण्यात आलेल्या या आकडेवारीत या सर्व क्षेत्रांतील व्यावसायिक घडामोडींमध्ये कमालीची घट होण्याची चिन्हे तर दिसत आहेतच, शिवाय संपूर्ण जग आर्थिक मंदीच्या गर्तेत लोटण्याची शक्यताही अधिक गडद झाली आहे. या आकडेवारीनुसार, जगातील सर्वात मोठी अर्थव्यवस्था असलेल्या अमेरिकेतील आर्थिक घडामोडींमध्ये दोन वर्षांत प्रथमच घट झाली आहे. युरो झोनमध्ये जवळपास वर्षभरात पहिल्यांदाच असे घडले आहे. ब्रिटनमध्ये विकासदरही १७ महिन्यांतील नीचांकी पातळीवर गेला आहे. पश्चिमेतील देशांची ही स्थिती आहे, त्यामुळे अतिपूर्वेतील जपानमधील विकासदराच्या अंदाजात घट होण्याची चिन्हे आहेत.

यूएस कॉम्पोझिट पीएमआयमध्ये मोठ्या प्रमाणात घट :
एस अँड पी ग्लोबलने शुक्रवारी अमेरिकन कम्पोझिट पीएमआय आउटपुट इंडेक्सची प्राथमिक आकडेवारी जाहीर केली. निर्देशांक ४७.५ पर्यंत घसरला आहे. तर जून महिन्यात तो ५२.३ वर होता. या महत्त्वाच्या निर्देशांकात सलग चौथ्या महिन्यात घसरण नोंदवण्यात आली आहे. पीएमआय निर्देशांक ५० च्या खाली असणे म्हणजे आर्थिक क्रियाकलाप कमी होत आहेत. सेवा क्षेत्राच्या स्थितीचे वर्णन करणारी एस अँड पी ग्लोबल सर्व्हिसेस पीएमआयही जूनमधील ५२.७ वरून जुलैमध्ये ४७ वर घसरली आहे. तर बाजारात तो ५२.६ च्या आसपास असणे अपेक्षित होते.

अमेरिकेत पुन्हा एकदा मंदीसदृश परिस्थिती :
या आकडेवारीमुळे पुन्हा एकदा अमेरिकेतील मंदीसदृश परिस्थितीबाबत चिंता व्यक्त केली जात आहे. एस अँड पीचे ग्लोबल चीफ बिझनेस इकॉनॉमिस्ट क्रिस विलियम्सन यांनी या आकडेवारीसह प्रसिद्ध केलेल्या निवेदनात, जुलै महिन्याच्या सुरुवातीची आकडेवारी अर्थव्यवस्थेतील चिंताजनक घसरणीचे द्योतक असल्याची कबुली दिली आहे. कोरोना महामारीमुळे लागू करण्यात आलेले लॉकडाऊनचे महिने काढले तर 2009 च्या आंतरराष्ट्रीय आर्थिक संकटानंतर उत्पादनात एवढी घट कधीही दिसून आली नाही, असे त्यांचे मत आहे.

युरो झोनचा संमिश्र पीएमआयही जुलैमध्ये 50 वरून खाली आला :
अशीच काहीशी परिस्थिती युरो झोन देशांच्या बाबतीत आहे. जुलैमध्ये या प्रदेशातील संमिश्र पीएमआयही 49.4 पर्यंत खाली आला आहे, जो फेब्रुवारी 2021 नंतरचा सर्वात कमी स्तर आहे. जून 2022 मध्ये हा निर्देशांक 52 वर होता. जुलैमध्ये हा निर्देशांक किंचित घसरून ५१ वर येऊ शकतो, असे तज्ज्ञांचे मत होते, पण तो ५०च्या खाली जाण्याची भीती कोणालाही वाटत नव्हती. युरोपियन सेंट्रल बँकेनेही (ईसीबी) शुक्रवारी आर्थिक स्थितीवर चिंता व्यक्त केली आणि म्हटले की, एकूणच विकासाचा दृष्टिकोन खूप कठीण दिसत आहे. असे असतानाही महागाई आणि पगारवाढीचा दबाव हा संपूर्ण युरो झोनच्या व्यवसायाला धोका ठरत आहे. ईसीबीने ७१ युरो झोन कंपन्यांच्या सर्वेक्षणातील माहितीच्या आधारे ही माहिती दिली.

आर्थिक मंदीच्या काळात उच्च व्याजदर मोठे आव्हान :
युरो झोनमधील चलनवाढीचा दर गेल्या महिन्यात ८.६% च्या उच्चांकी पातळीवर राहिला, ज्यामुळे ईसीबीने गुरुवारी व्याजदरात ५० बेसिस पॉईंट्स किंवा ०.५० टक्क्यांनी वाढ केली, ज्याची कोणालाही अपेक्षा नव्हती. अमेरिकी फेडरल रिझर्व्हही ४० वर्षांतील सर्वाधिक महागाई दराशी झुंज देत आहे. पुढील आठवड्यात होणाऱ्या बैठकीत तेही व्याजदरात ७५ बेसिस पॉइंटने वाढ करण्याची घोषणा करू शकतात, अशी अपेक्षा आहे. आर्थिक मंदीच्या वातावरणात व्याजदरात झालेली वाढ ही परिस्थिती अधिक कठीण करत आहे. जपानच्या पीएमआय निर्देशांकातही जुलै महिन्यात उत्पादनाचा वेग गेल्या १० महिन्यांतील नीचांकी पातळीवर असल्याचे दिसून आले आहे. साहजिकच जुलैच्या पीएमआयची ही आकडेवारी उत्पादन क्षेत्राच्या मागणीत घट होण्याबरोबरच सेवा क्षेत्रातील कमकुवतपणा वाढल्याचेही दर्शवते.

पीएमआय म्हणजे खरेदी व्यवस्थापकांचा निर्देशांक काय आहे :
जगातील ४० हून अधिक देशांसाठी पीएमआय म्हणजेच पर्चेसिंग मॅनेजर्स इंडेक्सचा डेटा गोळा केला जातो. सर्वच कंपन्यांच्या खरेदी व्यवस्थापकांच्या मते, बाजाराची स्थिती कशी आहे, हे या आकडेवारीवरून दिसून येते. व्यवसायाशी संबंधित उपक्रम वाढत आहेत, स्थिरता आहे किंवा घट होत आहे. ही आकडेवारी जगभरातील आर्थिक स्थितीचे प्रभावी आणि मोठ्या प्रमाणात अचूक संकेत मानण्यात येते. शुक्रवारी जगातील अनेक देशांसाठी जुलै २०२२ ची पीएमआयची प्राथमिक आकडेवारी चिंताजनक आहे.

जगातील दुसरी सर्वात मोठी अर्थव्यवस्था चीन :
दरम्यान, जगातील दुसरी सर्वात मोठी अर्थव्यवस्था असलेल्या चीनमध्येही कोविडमुळे नव्याने लॉकडाऊन लागू करण्यात आला असून, त्यामुळे परिस्थिती आणखी बिघडण्याचे काम झाले आहे. दुसऱ्या तिमाहीत चीनच्या आर्थिक विकासदरात झालेली मोठी घसरण हा त्याचाच परिणाम आहे. रशिया आणि युक्रेन यांच्यातील युद्ध आणि पाश्चिमात्य देशांत घटत चाललेली मागणी यामुळे भारतीय अर्थव्यवस्था सावरण्यासाठीची आव्हानेही वाढली आहेत. अशा परिस्थितीत येत्या काही महिन्यांत आर्थिक मंदीचा धोका संपूर्ण जगासमोर असून तो गंभीर असण्याची शक्यता नाकारता येत नाही.

महत्वाचं : तुम्हाला हा लेख/बातमी आवडली असेल तर नक्की शेअर करा आणि महाराष्ट्रनामाला फॉलो करा. तसेच शेअर बाजारातील गुंतवणुकीसंदर्भात तज्ज्ञांनी दिलेल्या सल्ल्याशी आमचा काहीही संबंध नाही. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. शेअर खरेदी/विक्री हा बाजार तज्ज्ञांचा सल्ला आहे. म्युच्युअल फंड आणि शेअर बाजारातील गुंतवणूक ही जोखमींवर आधारित असते. त्यामुळे कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.

News Title: Global Slowdown Darken PMI data as cost of living inflation and high interest rates global crisis check details 23 July 2022.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.