#आयपीएल२०१९ - पंजाबचा राजस्थानवर १२ धावांनी विजय

मोहाली : मोहालीच्या मैदानावर अटीतटीच्या लढतीत अखेर पंजाबने राजस्थानवर १२ धावांनी मात केली. राहुलचे अर्धशतक आणि मिलरची फटकेबाज खेळीच्या जोरावर पंजाबने राजस्थानपुढे १८३ धावांचे आव्हान ठेवले होते. त्या आव्हानाचा पाठलाग करताना राजस्थानचा संघ १७० धावांपर्यंतच मजल मारू शकला. स्टुअर्ट बिन्नीने शेवटच्या टप्प्यात ११ चेंडूत ३१ धावा केल्या, पण त्याचे प्रयत्न अपुरे पडले.

आयपीएल चषक क्रिकेट स्पर्धेतील राजस्थान-पंजाब लढतीत प्रथम फलंदाजी करणार्‍या पंजाबने २० षटकांत १८२ धावांची मजल मारली. सलामीवीर राहुल ५२ आणि डेव्हीड मिलर ४० धावा यांच्या दमदार फलंदाजीमुळे पंजाबला १८० धावांचा पल्ला पार करता आला. राजस्थानचा कर्णधार अजिंक्य रहाणेने नाणेफेक जिंकून प्रथम पंजाबला फलंदाजी दिली. सुरुवातीला त्याचा निर्णय फायदेशीर ठरला. धोकादायक गेलला आर्चरने ३० धावांवर बाद करून राजस्थानला पहिले यश मिळवून दिले. त्यानंतर गेलची जागा घेणारा मयांक अगरवालदेखील फार काळ टिकला नाही. त्याला सोढीने २६ धावांवर बाद करून राजस्थानला दुसरे यश मिळवून दिले. पण त्यानंतर राहुल-मिलर जोडी जमली. यांनी तिसर्‍या विकेटसाठी ८५ धावांची भाागिदारी करून पंजाबचा डाव सावरला. अखेर राहुलला उडानकटने ५२ धावांवर बाद करून ही जोडी फोडली.

त्यानंतर आलेला मनदीप सिंग आणि यष्टीरक्षक पुरन झटपट माघारी परतला. कर्णधार अश्विनने मिलरला बर्‍यापैकी साथ दिली. मिलरला धवल कुलकर्णीने ४० धावांवर बाद करून त्याला अर्धशती खेळी करू दिली नाही. मनदीप सिंगला आर्चरने भोपळादेखील फोडू दिला नाही. राजस्थानतर्फे आर्चरने सुरेख मारा करताना अवघ्या १५ धावांत ३ बळी टिपले. त्याने गेल, पुरण आणि मनदीप सिंगचे बळी मिळविले. तर कुलकर्णी उडानकट आणि सोढीला प्रत्येकी एक बळी मिळाला.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.